Sun’iy intellekt (SI) texnologiyalarining ta’lim sohasiga jadal kirib kelishi pedagogning an’anaviy rolini tubdan o‘zgartirmoqda. Avtomatlashtirilgan baholash tizimlari, adaptive learning platformalari va generativ SI vositalari o‘qituvchining bilim uzatuvchi funksiyasini qisman o‘z zimmasiga olmoqda. Natijada pedagog oldida yangi vazifalar – fasilitator, mentor, o‘quv dizayneri, axloqiy yo‘l-yo‘riqchi va raqamli kompetent mutaxassis sifatida shakllanish zarurati paydo bo‘ldi. Xalqaro tadqiqotlar (UNESCO, OECD, World Economic Forum) shuni ko‘rsatadiki, SI asridagi pedagog endi faqat bilim manbai emas, balki o‘quv jarayonini tashkil etuvchi va tanqidiy fikrlashni rivojlantiruvchi mutaxassis sifatida faoliyat yuritishi lozim. O‘zbekiston ta’lim tizimida “Raqamli O‘zbekiston – 2030” strategiyasi sharoitida ham pedagogdan raqamli savodxonlik va innovatsion yondashuv talab etilmoqda. Ushbu tezisda pedagogning yangi vazifalari tahlil qilinadi va amaliy yo‘llar taklif etiladi.