Zamonaviy ta’lim tizimining eng muhim yo‘nalishlaridan biri – kompetensiyaviy yondashuv asosida ta’lim mazmunini yangilashdir. Kompetensiyaviy yondashuv o‘quvchilarga nafaqat bilim berishni, balki ularni hayotiy vaziyatlarda qo‘llay olish, mustaqil qaror qabul qilish, muammolarni yechish va ijtimoiy faoliyatda ishtirok etish qobiliyatlarini shakllantirishga qaratilgan. U an’anaviy “bilim – malaka – ko‘nikma” modelidan farqli o‘laroq, natijaga yo‘naltirilgan, amaliyotga asoslangan va shaxsga yo‘naltirilgan ta’limni nazarda tutadi. Xalqaro miqyosda bu yondashuv OECD ning “Education 2030” loyihasi va UNESCO hujjatlari orqali qo‘llab-quvvatlanmoqda. O‘zbekiston ta’lim tizimida ham “Ta’lim to‘g‘risida”gi Qonun va davlat ta’lim standartlari kompetensiyalarni shakllantirishni asosiy maqsad sifatida belgilaydi. Amaliyotda esa o‘quv dasturlarining bilimga yo‘naltirilganligi, baholash tizimi va o‘qituvchilarning metodik tayyorgarligi bo‘yicha qiyinchiliklar mavjud. Ushbu tezisda ta’lim mazmunini yangilashning nazariy asoslari tahlil qilinadi va amaliy yo‘llar taklif etiladi.